Loterías y apuestas

Xestión de Loterías y Apuestas no século XXI

Loterías y Apuestas del Estado está á vangarda tecnolóxica do sector do xogo grazas á súa gran capacidade de desenvolvemento e innovación, que a dota dunha estrutura e un soporte avanzado de xestión e control, tanto dos xogos activos como dos pasivos.

LAE conta cun equipo de especialistas que garanten en todo momento os niveis de estabilidade, dispoñibilidade e rendemento dos servidores de datos e das aplicacións que se atopan nas instalacións do Centro de Procesamento de Datos (CPD) de Xaudaró, en Madrid, deseñados para dar soporte ao Sistema de Xestión Integral de Loterías (SIXILO) e ao sistema de xestión de persoal da entidade.

Para maior seguridade, estes servidores de datos e aplicacións teñen unha réplica de respaldo no CPD de Manuel Tovar (Madrid), que xestiona STL, a empresa tecnolóxica participada ao 100% por LAE, creada para prestar á entidade servizos de tecnoloxía da información e as comunicacións.

Ademais, co apoio de STL, LAE realiza a adquisición, instalación, mantemento e explotación de sistemas integrais de xestión de lotarías, materializados en 12.119 terminais de xogo, instalados nos máis de 10.500 puntos de venda distribuídos por toda a xeografía española.

A través destes terminais realízase a emisión de resgardos, a transmisión de datos aos equipos centrais para a posterior realización dos escrutinios correspondentes aos xogos activos que comercializa LAE, así como ao pagamento de premios de todos os xogos. Así mesmo, a través deles realízanse os resumos diarios de vendas e pagamentos.

Os dous centros de procesamento de datos, situados en distintas sedes, funcionan como centros simétricos de respaldo en alternancia, o que garante a continuidade e seguridade de todo o sistema de xogos.